Во Стопанската комора на Северна Македонија денеска пред претставници на бизнис-секторот премиерно беа презентирани функционалностите на „RALF AI“ – најновиот дигитален консултант базиран на вештачка интелигенција. Оваа иновативна платформа е креирана да им помогне на компаниите во секојдневното работење преку автоматизација, забрзување на деловните процеси, стручни анализи и брз пристап до релевантни информации.

Настанот со свое обраќање го отвори претседателот на Стопанската комора на Северна Македонија, Бранко Азески. Осврнувајќи се на значењето на технолошкиот развој и имплементацијата на новите софтверски решенија, тој нагласи дека домашното стопанство не смее да заостанува зад глобалните технолошки трендови.

„Работиме на сите фронтови. Денеска фокусот е на вештачката интелигенција каде што и ние имаме што да понудиме и да ги користиме најдобрите решенија. Кога ме прашуваат како ја гледам Комората за десет години, велам дека овие простории нема да постојат – сè ќе биде автоматизирано, а вработените ќе одат директно кај фирмите, а не обратно. Нашето оружје се вика упорност“, потенцираше Азески, нагласувајќи дека динамиката на модерниот бизнис бара постојано следење на промените и навремено прифаќање на иновациите.

Платформата „RALF AI“ нуди сеопфатна поддршка во повеќе клучни области, меѓу кои правото, финансиите, сметководството, банкарството, осигурувањето и администрацијата. Со ова дигитално решение, македонските компании добиваат моќна алатка за изготвување завршни сметки и даночни пријави, детална анализа на финансиски биланси, пресметка на даночни обврски, како и за брзо читање и прецизно толкување на закони, договори и други комплексни деловни документи.

Според креаторите, нејзината имплементација може да го намали времето потребно за извршување на секојдневните обврски и до 50 проценти, овозможувајќи рекордно брза обработка на податоците. Задачите за кои досега беа потребни часови, со помош на вештачката интелигенција сега ќе можат да се завршат за само неколку минути.

Алатката е наменета за широк круг професионалци – сметководители, правници, адвокати и административни работници, но и за сите менаџери и компании кои сакаат да ја подигнат својата продуктивност на повисоко ниво. Платформата ќе биде достапна 24 часа дневно, на македонски и на албански јазик.

„RALF AI ќе ви го скрати работното време за половина, но сепак, вие ќе бидете оние кои ја имаат финалната контрола. Оваа алатка нема да ги замени вработените, туку ќе им помогне и значително ќе го забрза нивниот работен процес. Со неа добивате фантастично толкување на законите и уште многу други придобивки. Притоа, личните и деловните податоци остануваат строго заштитени, тајни и безбедни, со примена на највисоките стандарди за заштита и сајбер-безбедност“, истакна Горан Рафајловски, сопственик на „Рафајловски консалтинг“, компанијата која ја разви оваа дигитална алатка.

Примената на вештачката интелигенција и напредните дигитални решенија отвора сосема нови хоризонти за ефикасно управување со информациите и поквалитетно донесување одлуки. Во таа насока, решенијата како „RALF AI“ се вистински сојузник на компаниите во нивната мисија да станат поконкурентни, пофлексибилни и поуспешни во современото деловно опкружување.