Во Стопанската комора на Северна Македонија се одржа јавна расправа на која Министерството за енергетика, рударство и минерални суровини ги претстави новите предлог-закони за рударство и геологија. Во фокусот на расправата беа усогласувањето со европските стандарди, дигитализацијата и одржливото управување со природните ресурси.

Компаниите од секторот имаа можност уште еднаш да ги разгледаат предложените законски решенија, да ги идентификуваат предизвиците во нивната практична примена и да предложат подобрувања во интерес и на државата и на стопанството. Предложените решенија се насочени кон обезбедување поголема правна сигурност, поттикнување на инвестициите, поефикасни административни постапки и зајакнување на заштитата на животната средина.

Рударството и геологијата не се само економски дејности. Тие претставуваат важен дел од индустриската основа на државата, обезбедуваат суровини за бројни други сектори, отвораат работни места, придонесуваат за локалниот и регионалниот развој и имаат значајна улога во економската и стратешката сигурност на земјата.

За овој сектор да се развива одржливо и конкурентно, неопходна е стабилна, јасна и предвидлива законска рамка. Потребни се правила што ќе овозможат одговорно управување со минералните суровини, квалитетни геолошки истражувања, безбедно работење и заштита на животната средина, а истовремено ќе создадат услови за нови инвестиции и модернизација на постојните рудници.

Со посебниот Закон за геологија се воспоставува системска рамка за геолошките истражувања и управувањето со податоците, додека воведувањето на Македонскиот рударско-геолошки информативен систем (МакРГИС) ќе овозможи дигитализација и поголема достапност на информациите.

Законот за рударство предвидува спроведување на Стратегијата за минерални суровини, воспоставување механизми за поддршка на стратешките проекти и усогласување со европските политики во областа на критичните суровини.

Во областа на заштитата на животната средина, новите законски решенија предвидуваат обврска за обезбедување финансиски гаранции во висина од 100 % од потребните средства за санација и рекултивација. Со тоа, државата добива механизам за обезбедување на потребните средства за обновување на просторот по завршувањето на експлоатацијата.

Истовремено, се воспоставуваат современи правила за управување со рударскиот отпад, задолжителни планови за затворање на рудниците и рекултивација, како и мерки за санација на историски деградираните рударски простори. На овој начин се зајакнуваат механизмите за заштита на животната средина и се создаваат услови за поодговорно и одржливо користење на минералните ресурси.

Претставниците на Македонската асоцијација на рударството (МАР) уште еднаш јасно ги посочија проблемите, ги аргументираа своите забелешки и предложија конкретни решенија. Беа презентирани искуствата на компаниите што секојдневно ги применуваат законските одредби во своето работење, како и стручните мислења на геолозите, рударските инженери и другите професионалци од секторот.

Претседателот на Асоцијацијата, Диме Петроски, ја истакна важноста на соработката со Министерството, нагласувајќи дека само преку отворен дијалог и конструктивна соработка може да се дојде до решенија што ќе го заштитат јавниот интерес, ќе обезбедат поголема правна сигурност и ќе овозможат развој на конкурентен, технолошки современ и еколошки одговорен рударски сектор.

„Како Асоцијација, имаме одговорност да ги обединиме ставовите на нашите членки, да ги претставиме нивните оправдани интереси и да придонесеме кон создавање законски решенија што ќе бидат применливи, одржливи и долгорочно корисни за државата“, истакна Петроски во своето воведно обраќање.