Донирана комора за тестирање за Ковид - 19 во Центарот за јавно здравје Струмица од страна на Еуромакс Ресоурцес
➢ Актуелно (09.10.2020)
👁 Прочитано: 2781



Донирана комора за тестирање за Ковид - 19 во Центарот за  јавно здравје Струмица од страна на Еуромакс Ресоурцес

Центарот за јавно здравје во Струмица се опреми со комора со која ќе прави брза анализа на земените тестови за Ковид – 19 во својата лабораторија, што овозможува примероците за тестирање да не се праќаат во акредитираните лаборатории во Скопје, туку лабораторијата во Струмица самостојно ќе може да изработи околу 100.000 тестирања за целиот регион. Набавката на комората е донација од „Еуромакс Ресоурцес“, меѓународната компанија која го развива проектот за рударскиот мега-комплекс Иловица – Штука.

Центарот за јавно здравје Струмица е една од најстарите здравствени институции во земјава која ги опслужува жителите на општините Струмица, Валандово, Босилово, Василево, Ново Село и околните села. Донацијата ќе овозможи значајно да се скрати времето на чекање на резултатите од земените брисеви.

„Центарот ја поседува опремата за докажување Ковид – 19, но недостигаше оваа таканаречена ламинарна комора за процесот да го реализираме во нашата лабораторија. Од таа причина, изминатиот период сите лабораториски испитувања за Ковид - 19 траеја по неколку дена бидејќи примероците се испраќаа во Институтот за јавно здравје во Скопје. Донацијата од „Еуромакс Ресоурцес“ ќе овозможи побрзо да им одговориме на оние кои чекаат резултати од тестирањето, што ќе значи и побрзо да се преземаат мерки за превенција и заштита на здравите и спречување на ширење на вирусот“, посочи директорот на Центарот за јавно здравје Струмица, Петре Витанов. 

Ова е втора донација на „Еуромакс Ресоурцес“ во здравствениот сектор во Струмица, откако минатиот месец и во оваа општина беше регистриран раст на бројот на заразени со корона вирусот. Приоритет во активностите на компанијата остануваат заштитата на здравјето на населението и на здравствените работници.

„Најавивме продолжување на донаторските активности во струмичкиот регион и денес сме тука со таа цел. Како општествено одговорна компанија веруваме дека со населението треба да се гради партнерски однос и соодветно да помогнеме за подобрување на животот во регионот и пошироко. Нема тука да застанеме. Напротив, компанијата веќе изгради став дека согласно нашата обврска кон локалната заедница ќе одвојуваме наменски фонд од по еден милион евра годишно за финансирање на повеќе локални проекти во првите две до три години по започнување со интензивна изградба на проектот. Ова би биле сосема нови и различни проекти за заедницата од оние големи инфраструктурни зафати кои се дел од нашиот генерален Проект. Развојот на регионов е еден од приоритетите и на Еуромакс“, посочи директорот за корпоративни комуникации и односи со јавност на „Еуромакс Ресоурцес“, Живко Груевски.

Минатата недела „Еуромакс Ресоурцес“ донираше заштитни маски и скафандери во Здравствениот дом – Струмица.

 

 

Служба за информирање при Комората