Европската банка за обнова и развој (ЕБОР), за прв пат доби жена за директор, французинката Одил Рено Басо
➢ Актуелно (09.10.2020)
👁 Прочитано: 2961



Европската банка за обнова и развој (ЕБОР), за прв пат доби жена за директор, французинката Одил Рено Басо

Европската банка за обнова и развој (ЕБОР), ја избра французинката Одил Рено Басо за нова директорка, на генералното собрание кое се одржа виртуелно, поради ковид пандемијата. Рено Басо, досегашнатa генерална директорка на Трезорот на Франција, е првата жена на местото шеф на ЕБОР. Таа во 2016 година, исто така беше првата жена која беше поставена на челната позиција на Трезорот, едното од главните одделенија во француското министерство за економија и финансии.

Рено Басо ќе ја преземе должноста подоцна годинава, од британецот Сума Шакрабарти, кој во јули поднесе оставка, а во ЕБОР беше директр од 2012 година.

Организацијата за годинешното собрание на ЕБОР беше одложена од мај за октомври поради мерките за изолација воведени поради пандемијата со корона вирусот.
Вршителот на должност претседател, Јирген Ригтерник, и честиташе на новата шефица оценувајќи дека таа на банката ќе и донесе „огромно меѓународно искуство“. 
„Знам дека сме во многу добри раце во моменти кога започнуваме ново поглавје во триесетгодишната успешна историја на банката“, изјави Ригтерник.

Новата директорка изјави дека е почествувана и дека сака да почне да работи со акционерите, управата и вработените, за спроведување на амбициозните планови во наредните месеци, кои се одобрени на Собранието. Рено Басо дипломирала администрација и политички науки на Парискиот институт, а ја посетувала и школата за админситрација на Харвард.

ЕБОР досега имаше 6 претседатели од 1991 година наваму, три французи, двајца германци и еден британец. Со седиште во Лондон, банката е фирмирана по распадот на Берлинскиот ѕид со цел да им помогне на источните земји во транзицијата кон пазарна економија. Од финансиската криза 2007-2008 банката силно ја прошири својата активност и во насока на економскиот развој, но и борбата против климатските промени.

 

Служба за информирање при Комората